O equipo de goberno do Concello de Pantón informa dos traballos realizados para o abastecemento de auga en diferentes poboacións: dotación de auga na Guítara, cun investimento de 80.000€, nos núcleos de Pereiro e Galegos, cun custe de 50.000€. Ademais dos traballos devanditos, tamén se levou o colector de auga a Salcedo –en Moreda– a través do Plan Único cun orzamento de 50.000€.
Ademais doutras obras de abastecemento que se executan a través de Augas de Galicia, rematáronse varias obras de mellora de distintas instalacións municipais, como a remodelación do Pavillón Municipal á que se dedicaron 150.000€ para arranxar o teito, acondicionar solos e vestiarios, e pintar as instalacións.
Na Casa Consistorial e na Casa da Cultura, o concello destinou 50.000€ para mellorar a accesibilidade. Na Casa do Concello instalouse un ascensor e mellorouse a canle de auga da Casa da Cultura para evitar filtracións de auga ao interior.
O alcalde, José Luis Álvarez amosa a súa satisfacción polo remate destas obras que “mellorarán a calidade de vida da veciñanza nestes núcleos co servizo de auga e as actuacións que beneficiarás aos usuarios/as destas instalacións municipais, pavillón, casa da cultura e casa consistorial”.
Para este 2023 o rexedor confía no remate do proxecto das residencias que a Fundación San Rosendo executará en Pantón para comezar as obras en breve, despois de que o convenio estea xa asinado.
