A veciñanza de Parteme, na parroquia quiroguesa de Nocedo, leva tempo demandando a adecuación dos servizos básicos, competencia que a Lei de Bases de Réxime Local atribúe de maneira exclusiva aos municipios, se ben, pola capacidade financiera dos consistorios acaban por ser cofinanciadas con fondos doutras administracións.

No caso de Parteme, a situación do saneamento levou a estes veciños a presentaren queixas en diversas institucións “e a promover, da man dos políticos locais, iniciativas máis alá do concello, xa que o actual rexedor negouse en repetidas ocasións a recibilos” aseguran os nacionalistas.

Os desencontros entre a veciñanza de Parteme e a administración local dura anos. Nese tempo, aseguran desde o BNG que prestaron o seu apoio a estas demandas e hai uns días o portavoz nacionalista, Xosé Manuel Fernández, visitaba Parteme coa Deputada no Parlamento, Carme Aira, e da responsable comarcal, RosaAna Prieto. Desta visita nacería a iniciativa e pregunta para resposta escrita que o BNG presentaba no Parlamento galego, “xa que é competencia do goberno da Xunta o medioambiente e a posible contaminación de augas que se pode dar se os verquidos non se depositan da maneira e no lugar axeitado”.