Os socialistas emprazan ao alcalde do Saviñao a facer as xestións oportunas para conseguir que a Xunta de Galicia cumpra coas competencias que lle outorga o Estatuto de Autonomía, e que constrúa unha residencia da terceira idade e un centro de día no municipio. “Para elo, hai unha parcela adquirida en 2011 pola Deputación a través de SUPLUSA en Escairón,” aseguran.

Celeste Rodríguez defenderá unha iniciativa na sesión plenaria, na que insta ao Concello “a adquirir o compromiso da Xunta de Galicia para a construción dunha residencia e centro de día, ofrecéndose a Deputación a ceder a finca logo de que haxa un acordo en firme por parte de Xunta e Concello”.

O voceiro socialista puntualiza que as competencias en materia de política social “son única e exclusivamente da Xunta de Galicia, como así se recolle no Estatuto de Autonomía de Galicia”, e lamentou que “o Goberno do PP leve preto de 14 anos sen abrir unha residencia pública na nosa comunidade”.

Dixo tamén que o PP “desmantelou o servicio de protección impulsado na lexislatura do bipartito co Goberno de Pérez Touriño”, e que a Deputación de Lugo “asumiu competencias pola inacción do Goberno autonómico, antes de Feijóo, agora de Rueda, na provincia de Lugo”. Así lembro que a Deputación “conta xa con nove centros de atención ás persoas maiores, que ofrecen máis de 300 prazas de atención e manteñen uns 230 postos de traballo directos, o 95% deles ocupados por mulleres. Ademais, ten outros 9 proxectos en marcha noutros tantos concellos rurais da provincia.”