O BNG de Pantón vén de recibir resposta da Consellaría de Infraestruturas e Mobilidade para reformular a sinalización do C.G. 2.1. na incorporación ao corredor dirección Monforte desde o “cruce do reguengo” onde aínda existe unha sinalización que indica como vía principal cara Monforte a estrada Lu-617 derivando á xente ao Alto de Moreda, “O que escapa á lóxica para a que foi construído o corredor, ademais de obrigar ao visitante a unha volta absurda e cunha incorporación nunha curva con alta sinistralidade cando esa era a estrada principal de uso” lembran os nacionalistas de Pantón, promotores da iniciativa rexistrada hai semanas pola Deputada, Carme Aira.

O BNG insiste na importancia, nun destino turístico de calidade, da sinalización correcta unificando a cartelería en coordinación coas diferentes administracións, “estes pequenos cambios son os que melloran a vida da xente e axudan a un desenvolvemento turístico ordenado, xa que son os establecementos de restauración e hospedería os que subsanan estes erros coas súas explicacións diarias”, destaca Rosana Prieto Florines.

Nesta liña, o BNG de Pantón está enviando peticións ás diferentes administracións, para que nese cruce que é parte do Camiño de Inverno, tamén se ordene a sinalización nas estradas provinciais LU-P-4112, LU-P-3204 e LU-P-4106, así como a información que se ofrece dos establecementos privados que dan servizo nesta zona.