Segundo información da Consellería do Medio Rural, o lume iniciouse ás 17:38 horas do pasado mércores con estimacións provisionais de afectación a unha superficie de 30 hectáreas. Para a súa extinción mobilizáronse, polo de agora, 4 técnicos, 25 axentes, 29 brigadas, 28 motobombas, 4 pas, 2 unidades técnicas de apoio, 5 helicópteros e 4 avións.
Dende o Concello de Taboada comentan que “por sorte non houbo que lamentar danos persoais nin casas afectadas, que sempre é o máis importante nestes casos. Os medios continuarán realizando as preceptivas labores de control para evitar que se poida volver reavivar”. Ademais, facían chegar por redes sociais o seu agradecemento a todo o persoal que traballou na extinción.
AVISOS EN CASO DE INCENDIO
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Tamén está dispoñible para a súa descarga ALume, a app para avisar sobre incendios forestais activos en Galicia, e o teléfono anónimo e gratuíto 900 815 085 para denunciar calquera actividade delituosa incendiaria da que se teña sospeita ou coñecemento.
