O pasado venres, 20 de setembro, comezaban as festas de Paradela cun dos pratos fortes deste ano, a orquestra Combo Dominicano.
O sábado 21, misa solemne na honra á Virxe das Dores ás 13:30 horas e a partir das 23:30 da noite terá lugar no campo da festa a actuación do grupo De Vacas. A actuación forma parte do seu “Tour Vacanal 2019” e chega a Paradela a través do programa Cultura no Camiño que promove a Xunta a través do Agadic.
A continuación, as veciñas e os veciños poderán gozar na verbena coa música da orquestra Claxxon.
A programación prevista para o domingo 22 comezará co pasarrúas da Banda de Música Ars Nova. Ás 13.30 horas terá lugar a procesión seguida da sesión vermú e a mostra dun artesán de forxa. Pola tarde, ás 18:00 h., disputarase o partido de fútbol entre o SD Paradela e o SDC San Lázaro e a partir das 19:00 h. os amantes da maxia poderán gozar co Mago Iago na Escola Vella. Iago é un cativo de Monforte, con nai de Paradela, que tivemos a ocasión de entrevistar en Xornal de Lemos para dar a coñecer a súa historia e o seu talento para esta disciplina artística.
E xa pola noite outro dos pratos fortes da fin de semana, verbena animada pola orquestra Panorama.
De cara ao domingo 29, día no que se celebra o San Miguel, ás 13.30 horas oficiarase a misa solemne con procesión, haberá sesión vermú, festa e verbena a cargo da orquestra Miramar.
