A Asociación Animalista Libera pediu endurecer os psicotécnicos de caza tras o caso de malos tratos animais en Chantada cunha cadela á que o seu propietario disparou, golpeou e arrastrou polo chan.

Libera critica o que considera “o cinismo dos lobbies procaza que, por unha banda afirman condenar os feitos, mentres manobran para impedir o endurecemento dalgunhas normas que lles regulan”.

Denuncian que os cazadores tentaron “rebaixar a idade para portar armas de fogo en Galicia, reducindo a idade para practicar a caza dos 16 aos 14 anos, que ata o Valedor do Pobo reprobou á Xunta este pacto cos grupos de presión, obrigando á administración a recular”.

Tamén falan da “escasa preocupación do Goberno que preside Alberto Núñez Feijóo pola seguridade nas cazarías, con tan só oito controis de alcoholemia realizados no período 2013-2018 e cunha norma que nin sequera esixe un consumo cero para poder portar unha arma e saír ao monte a matar animais”.

“O seu único traballo na materia foi subvencionar ‘cursos de seguridade’ cuxa asistencia é ínfima en comparación ao número de licenzas”, engaden.

Nesta liña, acusan o Goberno galego de manter o “silencio” desde que se coñeceu o caso da cadela maltratada, o cal, din, “contrasta coa iniciativa de oficio do Defensor do Pobo”, que pediu á Consellería de Medio Ambiente que traslade este suceso á Fiscalía.

Libera propón a modificación da Lei de Caza para endurecer os controis psicotécnicos e médicos, incluíndo a obriga de que “se realicen cunha periodicidade regular e que o exame da licenza de caza inclúa disposicións sobre benestar animal, cuestión que individuos como o de Chantada parecen descoñecer”.

E lamenta que os cazadores se opuxesen á Lei de Benestar Animal de 2017 que prohibe prácticas habituais no mundo cinexético como o uso de crueis colares de descargas eléctricas, a mutilación de orellas e colas dos cans ou o seu mantemento en canceiras inmundas sen ver a luz natural.