Comercio, Hostalería e Turismo marcas dun territorio que demandan definir as medidas que lles afectan

O BNG da comarca Lugo Sul considera necesario e imprescindible escoitar a voz de quen ten suspendida a súa actividade, o que deriva en graves problemas para o sustento do negocio. 

BNG encontro Monforte / BNG

Nunha xuntanza celebrada este sábado, 16 de maio, coa presenza de Olalla Rodil, parlamentaria por Lugo recolléronse os pareceres nos sectores do comercio, hostalería e turismo nas comarcas de Chantada, Monforte e Quiroga.

Os representante dos sectores económicos deixaron patente a orfandade por parte dalgunhas institucións, nomeadamente dos concellos, que máis alá de seren ou non titulares da competencia, “son quen deberían axudar a un sector que é clave para a supervivencia propia destes, así como prestar colaboración en tarefas básicas como as de asesoramento, achegamento de información ou de mantemento do territorio, tan importante para un xeodestino que vende a paisaxe como marca.”

A parlamentaria, Olalla Rodil, comprometeuse en nome do bng a seguir traballando para a reorientación de recursos como os 82 millóns de Euros que este ano 2020 a Xunta de Galicia tiña destinado á promoción do Xacobeo 2021, e que en todo ou en parte poden ser útiles para o sector.

O sector bota en falta protocolos claros de actuación, sobre todos os de carácter hixiénico sanitario e lamentan a carga burocrática e as dificultades que isto supón. Pide promoción dende as administracións, e recoñecen a incomodidade de teren que ser “subsidiados” da administración.

“Estamos nun momento crucial no que as administracións deben protexer  as iniciativas locais e pequenas que van ter maior dificultade de supervivencia, pero que son a marca  dos nosos destinos turísticos. Estes proxectos son fundamentais para a economía local porque alén de conservar e asentar poboación en idade activa na provincia, en especial no rural, favorecen de maneira clara a economía circular, que se demostrou imprescindible coa situación que estamos a vivir”, expuxo Rosa Ana Prieto responsable comarcal do bng, quen xunto cos demais responsables locais e Olalla Rodil reiteraron a dispoñibilidade do bng para que “nos utilicedes como ferramenta útil que leve a vosa voz ás diferentes institucións onde temos representación”.

DEIXAR UN COMENTARIO

Please enter your comment!
Please enter your name here