A plataforma cidadá Salvemos o Malecón organizará unha cadea humana rodeando o Malecón para manifestar a defensa da pasarela de madeira actual e os valores paisaxísticos, ambientais e urbanos do Malecón, a necesidade de pechar a Ponte Vella ao tráfico rodado e ao mesmo tempo a oposición da veciñanza á construción dunha nova ponte entre o Malecón e o barrio de Ramberde.

A concentración solicitada ante a Subdelación do Goberno en Lugo, organízase para o domingo, 27 de xuño dende ás 12:30h e as 14:30h nas Rúas do Malecón e o Paseo de Ramberde de Monforte. Informouse tamén das medidas de seguridade antiCOVID que se terán en consideración.

Desde a plataforma convidan a todos os veciños de Monforte e a súa contorna a consultar nas próximas semanas as súas redes sociais onde informarán das novidades acerca destes actos de concienciación ambiental, e a acudir á concentración que se celebrará o día 27 de xuño “todos aqueles veciños que desexen evitar que se cometa a atrocidade de estragar unha das zonas máis fermosas e emblemáticas da nosa vila,” conclúen.