O Clúster da Lousa de Galicia decidiu premiar a excelencia nos estudos do alumnado galego e fixo entrega de tres talóns de 300 euros a estudantes de bacharelato dos concellos do Barco, A Rúa e Quiroga.

No IES de Quiroga, o xerente do Clúster, Severino González, fíxolle entrega do premio ao ‘Mellor Expediente de Bacharelato’ a Lucía Álvarez Domínguez.

A quiroguesa recibía este premio acompañada do xefe de estudos do IES de Quiroga e profesor de matemáticas, Marcelo Pedredo, quen quixo destacar a calidade e excelencia académica desta quiroguesa quen recoñecía que lle “empezaron a gustar as mates  grazas as súas clases”.

Ademais, este non é o único premio que recolle Lucía desde que rematou os exames de selectividade. O pasado día 24 de xuño participaba nun acto telemático da USC no que se recoñeceu que tiña un dos mellores expedientes da ABAU deste ano.

PREMIADAS NA RÚA E NO BARCO DE VALDEORRAS

No IES Cosme López da Rúa de Valdeorras, resultou premiada Paula Pérez e no IES Martaguisela do Barco de Valdeorras gañou Inés Docampo.