Na inauguración da xornada tamén participaron Rosario Álvarez Blanco, Presidenta do Consello da Cultura Galega, Celia Pereira Porto, Presidenta da Fundación Vicente Risco, José Eduardo López Pereira, Presidente da Fundación Otero Pedrayo.
Maite Ferreiro sinalou na súa intervención “a necesidade deste tipo de actos de homenaxe, estudo e análise para ampliar e socializar o coñecemento do traballo que se levou adiante no ámbito das Irmandades da Fala e nas sucesivas asembleas nacionalistas, brutalmente interrumpido polo golpe de Estado do 36 e polo franquismo, que afogou o devir político, económico e cultural de Galiza” e remarcou “a importancia do legado desa etapa histórica na continuidade do nacionalismo e da lingua e da cultura”
Ademais de asistir aos relatorios desenvolvidos na xornada de mañá – “Construíndo identidade entre cultura e política: As Irmandades da Fala”, a cargo de Raúl Soutelo, e “A irmandade que viaxaba en comboio: contextos da Asemblea de Monforte”, de Xurxo Ayán, na Casa da Cultura Poeta Lois Pereiro, a vicepresidenta asistiu a unha lectura pública por parte de alumnado do IES A Pinguela de Monforte que, fronte ao Mosteiro de San Vicente, declamaron textos das persoas que participaron na IV Asemblea Nacionalista.
Pola tarde os relatorios foron sobre “Causas e consecuencias da ruptura das Irmandades da Fala na Asemblea de Monforte”, de Emilio Insua, e “Irmandiñas. Compromiso e paixón pola Terra”, de Aurora Marco, cun coloquio. A xornada rematou co concerto de Uxía Senlle e Sergio Tannus ás 20.00 horas.
