O pasado mes de xullo, o citado escrito asinado pola veciñanza foi remitido ao Concello, sen recibir unha contestación do equipo de goberno municipal, polo que acudiron ao Valedor, Ángel Gabilondo.

A presidenta da asociación Silamouras e candidata de Podemos ás vindeiras eleccións, Mercedes Martínez, asegura que grazas á intervención do valedor, “en xaneiro o concello remitiu contestación na que comunicaba que o tramo solicitado dependía da Consellería de Infraestruturas e Mobilidade. O Valedor do Pobo agarda agora, despois de case dúas décadas de inacción autonómica e municipal, a contestación da Consellería que permita saber á veciñanza porque non existen pasos de peóns nin outras medidas de calmado de tráfico nesta travesía tan concorrida especialmente en tempada alta, xa que é o núcleo de poboación máis próximo ao embarcadoiro do catamarán da Ponte do Sil.”

Mercedes Martínez insiste, “a veciñanza dos núcleos rurais tamén temos dereito a que se reduza a velocidade nas poboacións. Desde que pedimos estas medidas na Abeleda, noutros lugares do concello, como Boazo, tamén o solicitaron e o concello xa colocou sinais reducindo a velocidade a 30 Km/h, sen que se arbitraran máis medidas. Consideramos que é un paso adiante, pero aínda insuficiente. Merecemos respostas e merecemos que o desenvolvemento turístico da Ribeira Sacra non se faga esquecendo á xente que vivimos nela.”