“Decidimos cambiar de imaxe por unha máis actual, na que a persoa con discapacidade pasa de ser unha persoa estática a unha persoa máis dinámica e activa que interactúa con outras e demanda ser unha parte activa da sociedade, pero sen deixar de esquecer o nome co que naceu e os obxectivos e a misión para que naceu”, explica o presidente de AGORA, Manuel Barreiro Conde. Esta imaxe renovada é froito da colaboración con César Piñeiro Álvarez, deseñador gráfico de profesión e responsable da empresa Konclass Web Studio.
A presentación da nova marca coincide co trinta aniversario da entidade, un dos motivos polos que se animou a modificar a súa imaxe. Pero esta non é a única novidade que presenta. A entidade, que conta con preto de cen persoas asociadas, e ten un ámbito de actuación comarcal lanza a súa páxina web www.asociacionagora.gal, un portal no que presenta os diferentes servizos e programas que a asociación ten en marcha, como a fisioterapia, psicoloxía, logopedia, terapia ocupacional, transporte adaptado, residencia, información e asesoramento, obradoiros prelaborais e voluntariado.
O novo portal xa está operativo na rede Internet e, ao ter a característica de usabilidade, permite que se poida navegar por ela de xeito doado para as persoas que entran nela e desexan interactuar, por ser sinxela, intuitiva e agradable á vista. Ademais pode ser visible dende calquera dispositivo con conexión a Internet como ordenador, tablet ou dispostivo móbil. Na mesma pódense atopar as diferentes actividades que realiza a entidade así como información de interese ou información de como poder colaborar coa entidade.
