A actual pasarela sobre o río Cabe, augas arriba da ponte da Barca ten 64,5m., non cumpre coa normativa actual e as recorrentes inundacións poñen en perigo a súa estabilidade. A nova pasarela, que manterá a localización actual, terá unha lonxitude de 130 m, con 4 pilas e cinco vans, dando cumprimento a todos os requisitos establecidos no Plan hidrolóxico.

Conectará ambas as marxes do río Cabe a través dos municipios de Pantón (marxe dereita) e Sober (marxe esquerda). “É unha actuación moi demandada pola veciñanza que nace co obxectivo de mellorar a mobilidade, a seguridade e a comunicación de 2 lugares, 2 parroquias e de 2 municipios unidos en torno ao río”, explicou Quiroga. “É unha forma de abrir novas posibilidades de roteiros e destinos para visitantes, nun lugar emblemático da provincia, como é a Ribeira Sacra” concluíu.

Os traballos consistirán na demolición por completo da pasarela existente, a construción dunha nova, e o acondicionamento dos accesos existentes. Dado que a área de actuación atópase dentro dunha zona declarada como Ben de Interese Cultural e catalogada como Rede Natura 2000 e Reserva da Biosfera, a solución definitiva que se adopte no proxecto construtivo deberá de contar previamente cos informes favorables das administracións competentes en materia de Patrimonio Natural e Cultural. O importe estimado para a execución das obras descritas supera os 1.350.000 euros, incluíndo o custo de redacción do Proxecto, a execución do contrato de obras, así como a dirección facultativa do mesmo.