Despois de abrir os calendarios das Feiras do Viño na D.O. Ribeira Sacra coa Feira do Viño de Chantada, seguíronlle a Feira do Viño de Amandi e a pasada fin de semana a Feira do Viño de Vilachá. Nesta ocasión a fin de semana do 13 e o 14 de maio protagonízaa a XXVIII Mostra de Viños da Ribeira Sacra de Pantón, declarada Festa de Interese Turístico de Galicia.

Nesta XXVIII edición participan 9 adegas: Alma das Donas, Casa Moreiras, Finca Míllara, Ciudáseis, Nogueiras, Capilla, Don Ventura, Saíñas e Corzoás. A apertura das casetas farase ás 12:45h do sábado e 15 minutos despois será a inauguración por conta do Conselleiro de Medio Rural, José González.

O sábado establécese servizo de autobuses con Monforte e Escairón. As saídas desde Monforte serán ás 13:00 e 19:30 e as saídas desde Escairón ás 13:45 e 20:15. Os regresos a Monforte serán ás 2:00 e ás 3:00 e os regresos a Escairón serán tamén nese horario.

Nesa xornada a partir das 21.30 haberá concerto do Grupo América que volverá a actuar despois do concerto do Grupo monfortino, Malenne ás 23.00.

O domingo ás 13.00 será a lectura do pregón que nesta ocasión correrá por conta do xornalista e comentarista deportivo, Tomás Guasch. O catalán volve a visitar o concello de Pantón, ao que chama a súa casa en Galicia, despois de que recentemente participara nunha charla deportiva xunto a Vicente del Bosque. O domingo completarase con música ás 16.30 do Folión Xograres de Lemos e actuación a partir das 19.00 da orquestra Saudade.

O alcalde, José Luis Álvarez, destacou a importancia desta cita para promocionar o municipio e os seus viños, os únicos con uvas das 3 ribeiras, Miño, Sil e Cabe, como recolle o cartel desta edición.

Este sábado para a inauguración da Mostra contarase tamén coa asistencia da Eurodeputada galega, Ana Miranda, e a Parlamentaria, Carme Aira, que entre as 9.30 e as 11.00 participarán na Rectoral de Castillón nun almorzo de traballo cos sectores produtivos.