O Xulgado do Penal número 1 de Lugo condenou este xoves a 16 meses de prisión a un mozo acusado de agredir cunha cachava finalizada en punta metálica a outro mozo e a un axente da Garda Civil na localidade de Sarria. Os feitos xulgados tiveron lugar, de acordo ao recolleito no escrito fiscal, en abril de 2020, cando o acusado rompeu a golpes a lúa dianteira do coche doutro veciño do municipio, que respondeu crebando cun bate de béisbol “todas as lúas de cristal” do automóbil do primeiro.
Ao decatarse do sucedido, o principal acusado (xa que o outro home tamén foi imputado por un delito de danos e condenado ao pago dunha multa de 900 euros) abalanzouse sobre este cunha cachava propinándolle unha serie de golpes e ferindo tamén co citado obxecto a un axente da Garda Civil que mediaba na disputa. Ambos tiveron que recibir asistencia médica.
O Ministerio Fiscal solicitaba inicialmente para o principal acusado unha pena de prisión acumulada de catro anos e medio (dous por un delito de atentado a un axente da autoridade e dous anos e medio por un delito de lesións) pero o acordo de conformidade alcanzado entre as partes reduciu a responsabilidade penal a 16 meses de cárcere.
Tamén deberá facer fronte o mozo ao pago dunha multa de 1.125 euros en concepto de responsabilidade civil, unha cifra á que haberá que sumar os gastos sanitarios do Sergas deducidos da atención prestada aos feridos. Tanto o axente como o home agredido renunciaron á indemnización polas lesións sufridas e a defensa solicitou a suspensión da pena de cárcere, á que non se opuxo a Fiscalía a condición de que o acusado non volva delinquir nun prazo de dous anos.
