O lema deste ano é  ¡SÚMATE! para poñer fin ás violencias contra as mulleres,  e ten como  obxectivo mobilizar á sociedade de Chantada para solidarizarse coas mulleres que sofren violencia, “queremos que sexan activistas,  defensoras e defensores dos dereitos das mulleres que padecen violencia. Co fin de previr condutas sexistas debemos camiñar cara un modelo educativo que supere o dominio e a submisión. A igualdade  apréndese dende a infancia, por iso tamén queremos facer protagonistas aos máis novos e achegarémonos aos centros educativos con distintas propostas”, sinala Pamela Fernández, concelleira de Igualdade e Saúde Pública, Turismo e Comercio.

Para conseguir estes obxectivos elaboráronse distintos carteis con mensaxes que referencian diversos aspectos da violencia machista. Desde o Concello faise un chamamento a todos os establecementos públicos da vila para adherirse á campaña colocando estas mensaxes nos seus escaparates.

Para os máis cativos elaborouse unha guía, Preme-off (guía de uso responsable de redes sociais e internet para familias). Este material repartirase nos centros educativos ao mesmo tempo que se impartirán talleres sobre a materia.

O CIM programa tamén actividades para a adolescencia, con obradoiros sobre a violencia de xénero no novo contexto dixital. “Non podemos esquecer que os contidos audiovisuais que se atopan na rede propagan estereotipos, violencias sexuais específicas contra as mozas e violencias simbólicas sobre o corpo das mulleres”, insiste Pamela Fernández.

Na celebración do 25N desde o Concello de Chantada queren lembrar todo o acadado ata agora e seguir denunciando a violencia á que son sometidas as mulleres. “É un día de loito e de loita que conmemoraremos tamén coa lectura do manifesto ante unha placa en recordo e agradecemento a todas as mulleres vítimas da violencia”, conclúe a concelleira de Igualdade.

Programación 25N

• CEIP XOAN DE REQUEIXO. Luns, 20 de novembro. Charla: Recomendacións para un uso responsable das redes
• CEIP ELOISA RIVADULLA. Luns, 27 de novembro. Charla: Recomendacións para un uso responsable das redes .
• IES LAMA DAS QUENDAS. Venres, 24 de novembro ás 9:00h. Obradoiro “Violencia de xénero no novo contexto dixital”, imparte Pantallas Amigas
• IES VAL DO ASMA. Venres, 24 de novembro ás 11:45h. Obradoiro “Violencia de xénero no novo contexto dixital”, imparte Pantallas Amigas
• BIBLIOTECA DE CHANTADA. Venres, 24 novembro ás 17:00. Contacontos: Rapazas de conto con Marisa Irimia
• 25 DE NOVEMBRO. Sábado, 25 de novembro ás 12:30 no paseo fluvial. Lectura de manifestó e placa conmemorativa