O día 31 de agosto desde as 11:00 horas darase a benvida ás persoas asistentes e enfocaranse diversas temáticas como o patrimonio, a realidade Ribeira Sacra, as experiencias doutras Federacións ou a problemática no ensino primario e no sector vitícola.
O sector primario e, nomeadamente, a crise que atravesa a viticultura na DO Ribeira Sacra será enfocada polos sindicatos SLG e UUAA, representados por Ana María Rodríguez Vázquez e Miguel Ángel Francés López. Igualmente, os recortes no ensino primario, especialmente destacados en Sober ou A Pobra do Brollón, terán o seu espazo coa presenza das ANPAS dos colexios afectados na provincia de Lugo.
O asociacionismo e o funcionamento das federacións estarán enfocadas pola Federación de Federación estatal, a Agrupación Miño de Ourense e as federacións de Valencia e Valladolid.
O territorio e o patrimonio, material e inmaterial froito dunha paisaxe humanizada ao longo dos séculos, enfocarase desde a Federación de asociacións da Ribeira Sacra e desde o Ecomuseo Pazo de Arxeriz, espazo no que se desenvolverá a xornada e que contará cunha visita guiada antes de xantar.
A xornada de convivio contará cun xantar popular ás 14 horas e música e danza pola tarde con venda de produtos artesáns e para rematar cunha queimada. Violeta e Daritja porán a danza fusionando tradición e modernidade e a agrupación tradicional, Son de Lugh, engadirá a nota musical do evento.
O encontro está organizado pola Federación de asociacións da Ribeira Sacra coa colaboración do Ecomuseo de Arxeriz e da Deputación de Lugo (programa Tradigalu).
