Aseguran desde a asociación de pais e nais deste centro de ensino que como resultado deste incidente, os menores víronse obrigados a baixar do vehículo e percorrer a pé o resto do tramo ata a aldea de Seoane, onde foron recollidos polas súas familias, mentres o tráfico continuaba aberto. “Transitar camiñando esta estrada supón un grave perigo, é tan estreito que na súa maioría os peóns non teñen espazo para apartarse en caso de cruzarse cun vehículo, o que incrementou de forma significativa o risco para a seguridade dos pequenos. Ademais, algúns nenos asustáronse, chegando un deles a chorar debido ao acontecido”.
Consideran que a situación é totalmente inadmisible e pon de manifesto a urxente necesidade de adoptar medidas axeitadas para evitar que incidentes coma este volvan suceder. Neste sentido, hai uns días a ANPA instou á empresa Alfer a dotar ás liñas de transporte escolar afectadas de medios adecuados para transitar por este desvío, que presenta pendentes de ata o 30%, solicitando a asignación de vehículos con tracción ás catro rodas e caixa redutora, cuestión pola que esperan resposta.
“É urxente que a empresa de transporte tome as medidas necesarias que garantan a seguridade dos escolares e eviten a exposición a situacións de risco coma a vivida. A protección e seguridade dos nosos fillos e fillas é unha prioridade que non pode ser comprometida”, afirman que de non ser atendidas estas reclamacións nos próximos días convocarán mobilizacións reclamando que se garantice a seguridade dos nenos neste traxecto.
