O Concello de Chantada colabora co Proxecto Nós, unha iniciativa que pretende que a lingua galega non fique excluída dos novos desenvolvementos dixitais e converter a Galicia en vangarda na elaboración de produtos baseados en Tecnoloxías da Linguaxe.

En Chantada, a recollida de voces farase este 22 de outubro en horario de 10:00h a 14:00h e de 16:00h a 20:00h, na aula de informática (Aula CEMIT de Chantada), na rúa Ribeira Sacra s/n. As persoas interesadas en colaborar doando as súas voces para o Proxecto Nós poden inscribirse ata o mesmo día 22 de outubro na Casa da Cultura, ben presencialmente ou por teléfono 982 441 752.

Cando o proxecto estea rematado poderase acceder de balde a ferramentas como: sistemas de síntese de voz, de recoñecemento de fala, de xeración automática de texto, de diálogo ou axentes conversacionais, de tradución automática, de extracción de información e minaría de textos, resumidores automáticos ou correctores lingüísticos automáticos.Para conseguir todas as gravacións necesarias en lingua galega o Proxecto Nós, ademais de trasladarse físicamente a concellos, como fai en Chantada, ten a opción de captación de voces online (https://doagalego.nos.gal).

O Proxecto Nós (www.nos.gal) está impulsado pola Xunta de Galicia (a través da Secretaría Xeral de Lingua e AMTEGA) e a Universidade de Santiago de Compostela (USC), que conta coa colaboración do goberno central e da Unión Europea a través do PERTE “Nuevas tecnologías de la Lengua” financiado con fondos Next Generation-UE.