O alcalde de Monforte, José Tomé Roca, anunciou este mércores un novo proxecto de mellora na contorna da Zona C. Actuarase á beira do río, no Paseo que transcorre entre a Ponte Nova e a Gardería Municipal, incluíndo un anaco situado despois da gardaría. Con esta actuación, o paseo do río terá continuidade a partir da Ponte Nova ata a zona de Cobas.

As obras, cun prazo de execución dun mes, consistirán na dotación do novo firme deste paseo, que forma parte da rede viaria municipal, nunha lonxitude total de 190 metros e un ancho medio de 4,45 metros. Polo que a superficie total de actuación será de 845 m². Contruiranse dous tramos de muro de pedra, co obxectivo de completar o existente ó borde do pase, substituíndo a baranda de madeira que hai nas proximidades da Ponte Nova.

Por último, levarase a cabo a colocación de pilonas de aceiro inoxidable, para evitar a entrada de vehículos desde a avenida de  Galicia. Ós garaxes poderase acceder pola entrada actual.

“Estou seguro de que con esta actuación, seguiremos a potenciar o valor desta parte da cidade e do río Cabe, algo que fixemos significativamente coa consecución da Zona C, e que tamén faremos cando levemos a cabo a Zona D”, destacou o Alcalde.