O 2024 esmorece e o 2025 asoma xa a cabeza, co cal é tempo de botar man do clásico ‘Top dez’ de novas que tiveron máis repercusión informativa neste medio dixital. Como en anteriores ocasións, imos deixar ao marxe as que etiquetamos como sucesos para centrarnos no resto.
1-Escoltada unha ambulancia desde Monforte a Lugo cun bebé recentemente nado.
Aconteceu o 31 de maio cando uns axentes da Garda Civil tiveron que escoltar entre Monforte e Lugo a unha ambulancia na que viaxaba un recentemente nado de dous quilos nunha incubadora.
2-Estefanía Fernández, de Monforte a La Voz Kids, cantando en francés.
Nesta nova, Xornal de Lemos entrevistou en xuño a Estefanía Fernández, unha rapaza de 14 anos que concursaba no programa La Voz Kids –Antena 3— formando parte do grupo de Rosario Flores.
3-Cámaras ocultas nun reloxo de parede dun hotel de Bóveda.
En xullo informabamos que, tras unha operación policial en marcha dende o ano anterior–operación Norbates–, a Garda Civil detiña a dous homes como presuntos autores de varios delitos contra a intimidade por colocar cámaras ocultas nas habitacións dun hotel da localidade lucense de Bóveda.
4-Puido haber unha ALTRI en Quiroga no 1976?
Foi curioso este caso, pois non resulta habitual que un artigo de opinión ocupe os primeiros postos das novas máis vistas. Trátase dunha interesante achega do historiador quirogués Xosé Estévez que lembra o intento de instalación de fábricas de celulosas en diferentes localidades de Galicia a mediados dos anos 70. No caso concreto centrou os feitos acontecidos nun dos concellos afectados que presentou oposición popular: Quiroga.
5-O PP asegura que as obras do ferrocarril que ían durar 7 meses alongaranse ata os 3 anos.
Nesta noticia dábase conta da denuncia que facía o Partido Popular no mes de maio alertando de que as obras de renovación do ferrocarril na provincia de Lugo, e concretamente na zona sur, levaban camiño de converterse “no conto de nunca rematar”. Afirmaban tamén que cunha duración estimada de sete meses, segundo anunciaron dende o Goberno central, levaban camiño de durar tres anos, como mínimo.
6-Véndese a última parcela libre no Polígono dos Acivros en Chantada.
Sempre é ben recibido, e máis en concellos do interior de Lugo, que hai demanda de chan industrial. Pois ben, esta nova daba conta da sinatura no Pazo de San Marcos da compravenda da derradeira parcela dispoñible no Polígono Industrial do Concello de Chantada.
7-Felipe Grande: “Están vindo moitos clientes chorando, é moi emocionante.
O anuncio de peche da centenaria Panadería Carude foi un dos fenómenos sociais no 2024 en Monforte de Lemos. O noso xornal achegouse a falar con Felipe Grande, conversa moi emotiva como emotivas foron todas as mostras de agarimo que recibiu este artesán do pan dende que anunciou o peche por xubilación ata que efectivamente baixou a persiana.
8-O 26 de outubro volven os Cantos de Taberna a Taboada.
Neste caso, o anuncio da IV edición dos Cantos de Taberna no Concello de Taboada foi tan ben recibido que fixo posicionar esta noticia entre as dez con máis alcance de Xornal de Lemos no 2024.
9-Afra Blanco: “A Feira do Viño de Quiroga é a primeira festa que descubrín de Galicia.
A mediática colaboradora televisiva Afra Blanco tivo tamén especial protagonismo este 2024 no sur de Lugo. Concretamente foi a finais de marzo co gallo de ser convidada como pregoeira para a Feira do Viño de Quiroga. A entrevista que se lle fixo dende Xornal de Lemos foi moi fluída e en todo momento amosouse moi cordial e próxima.
Esta reportaxe a unha emprendedora moi nova de Quiroga posicionouse no posto número dez deste ‘ranking’. A súa proxección en redes e o novidoso do proxecto, viu nicho de mercado axudando a organizar viaxes e mellorando a experiencia de autocaravanistas e campers que peregrinan a Santiago, fixeron que tivese un gran alcance.
