Efrén Castro, vicepresidente da Deputación de Lugo, achegouse este 28 de decembro ao mercado de Nadal de Quiroga, organizado polo concello coa colaboración da Asociación de Empresarios e Comerciantes do Xeoparque e co apoio económico da Área de Cultura e o Centrad (Centro de Arte e Deseño) que achegaron 5.000 euros.
Efrén Castro inaugurou o recinto, acompañado do equipo de goberno local, e visitou os postos de venda, que estiveron na Praza de España toda a fin de semana; pola mañá de 11:00 a 14:00 h. e pola tarde de 16:00 a 20:00 h.
Nadira (roupa, calzado e mercería), Etna (roupa, calzado e complementos), Xobel (roupa, bolsos e bixutería), Libraría Celia (libros e xogos educativos e de mesa), Adega EDV (viño e licores), Aruba (cafés e doces), Eryn (cremas e aceites), Aramel (mel da serra do Courel), Silvia (filloas), Caurelor (marmeladas, castañas ao baleiro e mel), Riomao Estudio Creativo (artesanía da Ribeira Sacra especialista en bixutería, decoración, chaveiros, colgantes…), Trapalladas Artesanía (bixutería en prata e coiro), Armaior (utensilios de cociña e decoración en madeira de oliveira) conformaron a oferta desta primeira edición do mercado do comercio local e da artesanía.
Feira de Nadal Quiroga 2024 / Concello de Quiroga
Un obradoiro de decoración de pintura e outro de elaboración de pulseiras de coiro, a visita do Apalpador e a actuación da charanga tradicional Benofán animaron o mercado durante a fin de semana.
Trala conclusión do evento, tanto os comerciantes que puxeron posto como o propio Equipo de Goberno amosaron a súa satisfacción pola boa acollida que tivo e os bos resultados económicos. Tanto é así que pensan xa en darlle continuidade a esta Feira de Nadal en vindeiros anos.
Feira de Nadal Quiroga 2024 / Concello de Quiroga
