O Concello de Chantada conta cun novo panel de información turística. Esta nova estrutura informativa localízase no paseo fluvial do río Asma e forma parte do proxecto “Restauración ecolóxica na Reserva da Biosfera Ribeira Sacra e nas Serras do Oribio e O Courel”, que executa a Consellería de Medio Ambiente nos 23 Concellos que forman parte deste territorio, entre os que se atopa o Concello de Chantada.
Panel Reserva da Biosfera / Concello de Chantada
Foi no ano 2021 cando o Consello Internacional de Coordinación do Programa Man and the Biosphere (MaB) da Unesco fixo esta declaración de Reserva da Biosfera para a Ribeira Sacra, Serras de Oribio e O Courel. Este territorio convertíase así na segunda Reserva da Biosfera máis grande de Galicia, cunha superficie total de 306.534,77 hectáreas. Entre os espazos protexidos que engloba está o ZEC Monte Faro, un dos espazos naturais máis importantes da Ribeira Sacra. En Chantada a paisaxe natural converxe coa patrimonial, clara mostra son os diversos elementos de interese dispersos pola serra, o val e a ribeira.
Este panel súmase aos paneis informativos, que o ano pasado recuperou o Concello de Chantada, no Cantón e na área de autocaravanas do Sangoñedo, e onde poder consultar o rueiro e o mapa municipal de Chantada xunto con información actualizada de interese.
Ruta Petróglifos das Lamelas
Precisamente desde o panel informativo que se instalara na Torre de Merlán no 2023 parte a ruta que leva ata aos Petróglifos das Lamelas e que o Concello de Chantada vén de sinalizar..
Este xacemento posúe dúas combinacións circulares, unha delas de gran singularidade, e numerosas coviñas. Desde a Torre pódense seguir os sinais de madeira que conducen aos petróglifos mediante unha pequena ruta duns 680 metros de lonxitude.
No panel lémbrase que o mellor momento para observar estas representacións é a primeira hora do día ou a última da tarde, coa luz rasante do sol. Outra opción é chegar ao escurecer e empregar unha lanterna en posición rasante. Aquí tamén se recolle información dos recursos patrimoniais máis significativos da parroquia, como a Capela da Torre, o Peto de ánimas de 1948 ou a senlleira Feira das Cabras.
Sinalización Ruta Petróglifos das Lamelas / Concello de Chantada
