Nesta primeira intervención, lévase a cabo a construción dunha pequena praza no inicio da Rúa Real, para eliminar este tapón urbanístico e abrir un espazo verde e de conexión visual entre o Campo da Feira e a Alameda.

Tamén se traballa na remodelación do Campo da Feira, detrás da casa consistorial. Levantouse parte do asfalto existente e habilítanse prazas de aparcamento para organizar o tráfico rodado e farase unha praza con pedra e formigón impreso, ademais de ampliar a zona arborada.

Na seguinte fase abrirase unha rúa peonil entre a Alameda e o Campo da Feira e contruirase unha cuberta adosada ao inmoble adquirido polo Concello coñecido como ‘Matadoiro do Touza’, que permita un uso polivalente.

O Campo da Feira, que contou con numerosos pendellos ata a década de 1980, garda unha grande importancia simbólica e patrimonial para Taboada por ser o lugar onde se desenvolvían as feiras. Na actualidade, pese a súa degradación, constitúe o lugar de zonas verdes máis importante da vila e por iso desde a tenencia de alcaldía procúrase a súa recuperación, tanto a nivel urbanístico, como celebrando de modo habitual actividades neste espazo.

As obras foron financiadas a través dun convenio asinado entre o Concello e a Vicepresidencia da Deputación de Lugo. A deputada, Iria Castro, comprobou o desenvolvemento dos traballos xunto co tenente de alcalde, José Portela, que agarda que “en poucos meses poidamos ver de forma satisfactoria o resultado de moitos meses de traballo, que implicaron a sinatura do convenio, a adquisición por vía de compra dos inmobles e terreos necesarios, e a elaboración e posta en marcha dun proxecto que procura a máxima calidade de equipamentos e materiais”.