Está claro que cando se trata de dar a coñecer Sober e promover os seus eventos “a cabeza non para”. Luis Guitián e o seu equipo de traballo sempre sacan un reclamo da manga para dar que falar, chamar a atención dos medios e poñer a súa vila e os eventos que organizan no mapa.
Desta volta a idea presentada é a bautizada como “Caravana do Amandi”, unha especie de oficina de turimo ambulante que dará a coñecer a XXXIX Feira do Viño de Amandi que se celebrará no Concello de Sober os días 13 e 14 de abril.
A primeira parada deste ‘stand móbil’ será o vindeiro 8 de abril en Escairón, aproveitando que este ano dedícaselle o evento ao Concello do Saviñao e aproveitando tamén que ese día é feira alí.
Outra parada será Lugo, onde a Feira do Viño de Amandi deste ano será presentada nun acto organizado en colaboración coa Delegación da Xunta de Galicia en Lugo e a Deputación Provincial.
Segundo palabras do Alcalde de Sober, Luis Fernández Guitián, en relación á caravana “a intención é levala a máis lugares, sobre todo vilas medianas ou ciudades grandes con obxectivo de promocionar a Feira do Viño de Amandi na edición deste ano e en sucesivas edicións”.
A creatividade na preparación da Caravana do Amandi correu a cargo de Sheila Pérez do Estudo de Deseño e Interiorismo Espazo Nu que ademais de pensar na funcionalidade non descoidou o deseño. Ademais de ser unha oficina de atención ao público, o seu interior fai a función de viñoteca e xa no exterior destaca a decoración con reclamos turísticos do concello. Como complemento para dar servizo ao público conta con mesas e cadeiras para colocar no exterior e ofrecer degustacións de viño nas súas visitas promocionais.
Continuando co “Mes do Amandi”, para este venres 29 de marzo están programadas as seguintes actividades:
Ás 12:30 h. na Oficina Municipal de Turismo preséntase a Exposición de fotografía ‘Viña Sacra’. Fotografías gañadoras do II Concurso fotográfico Christina Snellman. Colabora: Amigos de Manuel Jorge de Chantada.
Ás 16:30 h. os participantes nas ‘Merendas con Contos’ teñen unha visita didáctica a viñedos de Amandi. Organiza: Biblioteca Pública Municipal e colaboran os Viticultores do Amandi.
De 19:00 a 20:00 h. retransmisión en directo desde o Centro Sociocultural de Sober do Programa de Onda Cero ‘Gente Viajera de Galicia’ presentado por Susana Pedreira.
E xa pensando no sábado 30 de marzo:
Ás 11:00 h. recepción da Delegación do Concello de Vedra na Rectoral de Gundivós. A comitiva estará encabezada polo seu alcalde, Carlos Martínez Carrillo, e visitarán o concello dentro das Xornadas Técnicas de Promoción e Difusión da Cultura do Viño, organizadas pola Asociación Cultural e de Festexos Populares ‘San Miguel de Sarandón’.
Ás 20:00 h. no Centro Sociocultural, Concerto da Banda Nova de Allariz. Ao remate, brinde con Viño de Amandi.
