Dous mozos de 23 e 24 anos de idade foron evacuados a un centro hospitalario ao resultar intoxicados a causa do incendio causado por unha estufa no interior dunha vivenda en Monforte de Lemos mentres durmían.
Segundo informou o 112 Galicia, foi o fume provocado polo incendio o que alertou os afectados, que reaccionaron botando terra por encima do aparello. Con todo, sufriron unha intoxicación por inhalación de fume, que motivou a súa evacuación a un centro hospitalario.
Os feitos ocorreron ás 2,30 horas deste xoves nun domicilio situado na Rúa Concepción Arenal, en Monforte de Lemos. A chamada dos propios afectados o número único de emerxencias serviu para activar un operativo, no que participaron os bombeiros da localidade, así como os axentes da Policía Local e os profesionais de Urxencias Sanitarias de Galicia-061.
Ao lugar o 061 desprazou unha ambulancia de soporte vital avanzado para atender aos dous pacientes, o home W.G.B., de 23 anos, e a muller E.D.V.M., de 24 anos, que foron trasladados ao Hospital de Monforte, confirmaron fontes sanitarias.
Pola súa banda, efectivos de extinción comprobaron que había un intenso fume acumulado no interior da casa, pero a estufa estaba xa apagada, sinalaron por parte do 112.
