O Administrador de Infraestruturas Ferroviarias (Adif) aprobou a adxudicación dun contrato de máis de 23 millóns de euros para a mellora da infraestrutura no tramo Ourense-Monforte de Lemos.
Segundo explican nun comunicado, o contrato –adxudicado a Vías e Construcións por 23.074.700 euros– inclúe o tratamento de 12 pontes, oito túneles, un terraplén e 25 desmontes entre os puntos quilométricos 009/059 e 019/798 da liña Monforte de Lemos-Vigo (tramo Ourense-Monforte).
Os traballos –financiados pola Unión Europea-NextGenerationEU.– mellorarán tamén a drenaxe da infraestrutura, mediante a construción de novos elementos, e servirán para adaptar as estruturas aos parámetros marcados pola instalación de nova electrificación a 25 kV en corrente alterna, que se executará entre as estacións de Ourense e Monforte de Lemos.
Destacan ademais que o obxectivo das actuacións “optimizar as condicións de explotación comercial da infraestrutura en parámetros como a fiabilidade, o confort e os tempos de viaxe”. Así, ademais do xa citado, renovarase a liña aérea de contacto e optimizaranse as instalacións de seguridade e telecomunicacións, así como as plataformas e cruces entre plataformas das estacións do trazado.