O Consello de Administración de Adif aprobou a adxudicación dun contrato para optimizar pontes e explanacións nun tramo duns oito quilómetros da liña ferroviaria convencional que une Ourense e Monforte de Lemos.

O contrato adxudicouse á unión temporal de empresas (UTE) formada por Dragados e Tecsa Empresa Construtora, por un importe de 8.960.834,18 euros (IVE incluído) e cun período de execución de once meses.

En concreto, o proxecto comprende actuacións nun total de nove pontes, doce trincheiras e seis medias ladeiras. O obxectivo é adaptalos aos novos parámetros de explotación (incluído o gálibo) que require a electrificación a 25 kV que se instalará nesta liña entre as estacións de Monforte de Lemos e Ourense.

Así mesmo, optimizaranse os sistemas de drenaxe destes elementos da infraestrutura ferroviaria, así como as súas condicións de conservación e durabilidade. Tamén se ampliará o noiro existente no lado sur da estación ourensá dos Peares para, posteriormente, permitir que se constrúa a plataforma ferroviaria dunha futura vía desviada e conseguir unha lonxitude de estacionamento de 750 metros.

Adif destacou que este contrato se enmarca nas actuacións de mellora que se están levando a cabo no tramo ferroviario Ourense-Monforte de Lemos-Lugo co obxectivo de cumprir coa optimización das condicións de explotación comercial do traxecto. Esta actuación será financiada pola Unión Europea con fondos Next Generation.