Con esta sesión sobre saúde en maiores desde a perspectiva da Atención Primaria continúase o ciclo de actividades de Asomega Maiores, que comezou coa sesión sobre novas tecnoloxías que se celebrou no Hospital de Lugo e a de Vigo sobre saúde mental. Nesta ocasión o obxectivo da cita é analizar a abordaxe desde a Atención Primaria das principais cuestións de saúde relacionadas cos maiores:
- cambios na atención médica (avances e retos terapéuticos)
- modelo de atención primaria
- coordinación con outros niveis asistenciais
- promoción da saúde
- envellecemento activo
No encontro coincidirán todos os presidentes que tivo ata a data a Sociedade Española de Médicos Xerais e de Familia (SEMG):
- Pilar Rodríguez Ledo, que detenta actualmente esta responsabilidade
- Antonio Fernández Prol Ledesma (presidente de 2015 a 2023)
- Benjamín Abarca (presidente de 2007 a 2015)
- José Manuel Solla (de 2001 a 2007)
- Juan José Rodríguez Sendín (entre 1995 e 2001)
- Ignacio Burgos (de 1988 a 1995)
Estarán moderados por Inmaculada Ramos, directora do Distrito Sanitario de Monforte de Lemos. Área Sanitaria de Lugo, A Mariña e Monforte de Lemos. Os presidentes da SEMG debaterán sobre os cambios e evolución dos desafíos asistenciais e sanitarios na atención aos maiores en Primaria, baixo unha perspectiva temporal (últimos 35 anos), rural/urbana e de xénero.
O acceso é libre ao salón de actos do Hospital, previo rexistro nesta ligazón. Pero se non pode asistir, cabe a opción de conectarse en liña. Precisamente aproveitando esta posibilidade de asistencia remota, o Centro Galego de Madrid vai organizar un visionado conxunto en directo do evento no seu salón de actos.
Vídeo en directo: https://bit.ly/AsomegaMaiores_Monforte
Asomega é unha asociación sen ánimo de lucro cuxo propósito é aglutinar aos profesionais do ámbito da saúde de orixe galega ou que teñan lazos especiais con esta terra. O seu obxectivo é incentivar o contacto humano e profesional coas universidades galegas, impulsar a formación dos seus socios, celebrar reunións científicas e fomentar a difusión do coñecemento científico baseado na evidencia.
O seu actual presidente é o doutor Julio Ancochea, ourensán de Pobra de Trives, xefe de Servizo de Pneumoloxía do Hospital da Princesa de Madrid, profesor titular e delegado da Reitora de Ciencias da Saúde na UAM. Entre as actividades máis destacadas da entidade destaca a concesión do Premio Nóvoa Santos á investigación médica; a Insignia de Ouro a unha personalidade galega do ámbito sanitario; ou a Bolsa de Medicina Rural.
