Gran satisfacción do CCU de Monforte polo éxito acadado na edición deste 2025 da súa novidosa campaña de dinamización comercial “Rally do Comercio”. Desde o 1 ata o 24 de abril, 33 establecementos asociados participaron activamente nesta campaña, recollendo nas súas urnas miles de tickets de compra.
Aínda que o reconto final aínda está pendente por facer, desde a organización confirman que con case total seguridade triplicáronse o número de tickets respecto da pasada edición, o que reflicte o crecente interese e a forte acollida para participar dos clientes ano tras ano.
O SORTEO
O sorteo presencial, celebrado o xoves 24 de abril na Praza de España, contou cunha notable asistencia de público –superando as cifras do ano anterior– e estivo amenizado por Radio Monforte con música ambiental e megafonía para dar conta do desenvolvemento do sorteo e facer a espera máis levadeira.
O premio desta edición, un bote único de 3.300 euros, foi para José Antonio Expósito Gonzalvo, quen, debido a compromisos laborais, delegou a xornada de compras na súa muller, Lorena Quevedo Carmona. O ticket que fixo posible este premio correspondeu a unha compra de 199 euros en Alain Afflelou Monforte, óptica asociada ao CCU Monforte.
A XORNADA DE COMPRAS
O día de facer efectivo o premio foi o venres 25 de abril, unha xornada “moi intensa, frenética e moi eficaz”, comentan dende o CCU. A parella gañadora dispoñía dun máximo de 7 horas para gastar o premio, pero conseguiu completar as súas compras nos 33 establecementos participantes en tan só 5 horas e 40 minutos, finalizando a actividade cunha media de gasto aproximada de 101 euros por comercio. Os afortunados residen na parroquia de Piño, na Pobra do Brollón, son asturianos e levan nove anos asentada na Ribeira Sacra. En relación ao premio acadado, din dende a xerencia da entidade dinamizadora do comercio local monfortino, “expresaron o seu profundo agradecemento ao CCU e a todos os comerciantes participantes polo trato recibido, destacando que esta iniciativa permitiulles descubrir comercios locais que non coñecían e reafirmar a calidade e a proximidade do comercio de Monforte”.
VALORACIÓN FINAL
Desde o CCU de Monforte faise unha valoración altamente positiva da campaña, non só pola notable implicación do público, senón tamén pola enorme visibilidade que proporciona aos establecementos participantes.
Con todo, o xerente da asociación, Ángel Folgueira, sinalou que “para próximas edicións, sería desexable unha maior participación de negocios asociados, o que sen dúbida contribuiría a facer a campaña aínda máis espectacular e a elevar o atractivo do premio. O Rally do Comercio demostra, unha vez máis, que a colaboración, a innovación e a aposta polo comercio local son a mellor fórmula para seguir dinamizando Monforte e a Ribeira Sacra”.
