Despois de dous anos de ausencia por mor da pandemia volve ‘A Medieval’ de Monforte na que será a súa edición 18. Un paso máis para achegarse ás 20 edicións que se necesitan para acadar a condición de Feira de Interese Turístico de Galicia.
O pasado 26 de marzo, e durante o “Mercado para a Medieval”, presentábase o programa oficial da XVIII Feira Medieval de Monforte, e esta semana subíase o mesmo á páxina web do concello. Un folleto no que figura o plano, co detalle de todos os postos que haberá no Mercado Medieval, e a programación completa e ao detalle de todos os espectáculos e actividades que haberá ao longo da fin de semana.
Días atrás xa avanzamos algo do programa en Xornal de Lemos, pero accedendo a esta información calquera que queira vivir este gran evento poderá organizarse e orientarse en función das súas preferencias.
O ‘Mercado Medieval’ conta con 103 postos, 50 de artesanía, 34 de alimentación e 19 de comercio; e no apartado de actividades e espectáculos, por citar algúns, haberá: Campamento Medieval, Salva de Artillería, obradoiros medievais, espectáculos de aves de rapiña e cetrería, Xustas Medievais, música de rúa, Desfile do Dragón, etc.
